மிஸ் யூ! ஏர்டெல், வோடபோன் ஐடியாவை கலாய்த்த ஜியோ

காதலர் தினத்தை முன்னிட்டு ட்விட்டரில் பதிவிட்ட ரிலையன்ஸ் ஜியோ நிறுவனம் தனது போட்டியாளர்களை மறைமுகமாக கேலி செய்துள்ளது.

ரிலையன்ஸ் ஜியோ தொலைத்தொடர்பு சேவை கடந்த 2016ஆம் ஆண்டு செப்டம்பரில் அறிமுகமானது. அனைத்து அழைப்புகளும் இலவசம், இன்டர்நெட், இலவசம், எஸ்.எம்.எஸ். இலவசம், ரோமிங் கட்டணம் இலவசம் என அனைத்தையும் ஓசியில் கொடுத்து கோடிக்கணக்கான வாடிக்கையாளர்களைக் இழுத்துக்கொண்டது.

பின் கட்டண சேவையைத் தொடங்கினாலும் பல்வேறு சலுகைக் கட்டண திட்டங்களை அறிவித்து வாடிக்கையாளர்களைத் தக்கவைத்துக்கொண்டது. தொடர்ந்து புதிய வாடிக்கையாளர்களையும் கவர்ந்த ஜியோ, 20 கோடி வாடிக்கையாளர்களைத் தாண்டிவிட்டது.

இந்நிலையில் காதலர் தினத்தில் ஏர்டெல், வோடபோன் ஐடியோ உள்ளிட்ட தனது போட்டியாளர்களைக் குறிவைத்து நக்கலாக ட்விட்டரில் பதிவிட்டுள்ளது. “ஒரு காலத்தில் சிம் 2 இடத்தில் இருந்தீர்களே? இப்போது எங்கே இருக்கிறீர்கள்” என்று ரிலையன்ஸ் ஜியோ தனது அதிகாரப்பூர்வ ட்விட்டர் பக்கத்தில் குறிப்பிட்டுள்ளது.
ஜியோ 4G சிம் கார்டு என்பதால் அது அறிமுகமான புதிதில் பெரும்பானவர்கள் தங்கள் மொபைலின் சிம் 1 இடத்தில் ஜியோ சிம் கார்டை பயன்படுத்தினர். கிட்டத்தட்ட எல்லா மொபைல்களிலுமே 4G வசதி சிம் 1ல் மட்டுமே வழங்கப்பட்டிருந்தது. இதனால், ஜியோ தவிர மற்ற நிறுவனங்களின் சிம் கார்டுகளை 2வது சிம் கார்டுக்கு உரிய இடத்திலேயே வாடிக்கையாளர்கள் பயன்படுத்தினார்கள்.

இதை வைத்துத்தான் ஜியோ நிறுவனம் தங்களை போட்டியாளர்களை நோக்கி, சிம் 2வில் கூட இப்போது உங்களைக் காணவில்லையே என்று மறைமுகமாக கிண்டல் செய்துள்ளது.