Baba Amte Birth Anniversary: மனிதநேய ஆர்வலர் பாபா ஆம்தேவுக்கு டூடுள் வெளியிட்ட கூகுள்

சமூகசேவகரும், தொழுநோயால் பாதிக்கப்பட்டவரின் நலனுக்காக தீவிரமாக செயல்பட்டுவருமான முரளிதர் தேவிதாஸ் ஆம்தேவுக்கு கூகுள் நிறுவனம் டூடுள் வெளியிட்டு பெருமைப்படுத்தி உள்ளது.

மஹாராஷ்டிரா மாநிலத்தை சேர்ந்த முரளிதர் தேவிதாஸ் ஆம்தே பலராலும் ’பாபா ஆம்தே’ மற்றும் ’ஃபாதர் ஆம்தே’ போன்ற பெயர்களால் அழைக்கப்படுகிறார். அவருக்கு இன்று 104வது பிறந்தநாள்.

இன்றும் மனிதநேய ஆர்வலர்களால் போற்றப்படும் பாபா ஆம்தே, பாதிக்கப்பட்ட மக்களின் நலனுக்கு வேண்டி பல்வேறு வகையில் உதவிகளைச் செய்துள்ளார். மேலும், தொழுநோயால் பாதிக்கப்பட்ட மக்களிடன் அரவணைப்பு காட்டினார்.

1914ம் ஆண்டி மஹாராஷ்டிராவில் செல்வந்தர் குடும்பத்தில் பிறந்தார் பாபா ஆம்தே. கூகுள் நிறுவனம் வெளியிட்டுள்ள தகவலின் படி, செல்வசெழிப்பான குடும்பத்தில் பிறந்ததால் பாபா ஆம்தே சிறுவயதில் பொறுப்பற்றவராக இருந்துள்ளார்.


ஆனால் தனது இளைய வயதில் தொழுநோயால் பாதிக்கப்பட்ட ஒருவர் படும் இன்னல்களை பார்த்த போது அவருக்கான சமூகசேவைகளின் மீது ஆர்வம் பிறந்தது. தேசிய ஒருமைப்பாட்டின் மீது ஆர்வம் கொண்ட அவர், நாட்டின் ஒற்றுமைக்காக தன்னுடைய 72வது வயதில் காஷ்மீர் முதல் கன்னியாகுமரி வரை நடைப் பயணம் மேற்கொண்டார்.

தொடர்ந்து மனிதநேய செயல்பாடுகளில் ஆர்வம் காட்டி வந்த பாபா ஆம்தேவுக்கு 1971ம் ஆண்டு மத்திய அரசு பத்மஸ்ரீ விருது வழங்கி கௌரவித்துள்ளது. அதேபோல 1988ம் ஆண்டு ஐநா சபை, மனித உரிமைகள் பிரிவில் உயரிய பரிசையும், 1999 அமைதிக்கான காந்தி விருதையும் பாபா ஆம்தேவுக்கு வழங்கி பெருமை சேர்த்துள்ளது.