காங்., வேட்பாளர் பட்டியல் விரைவில் வெளியாகும்: இளங்கோவன்

சென்னை: தமிழக சட்டமன்ற தேர்தலில் போட்டியிடவுள்ள காங்கிரஸ் கட்சி வேட்பாளர் பட்டியல் விரைவில் வெளியாகும் என்று தமிழக காங்கிரஸ் தலைவர் ஈ.வி.கே.எஸ்.இளங்கோவன் தெரிவித்துள்ளார்.

திமுக கூட்டணியில், இன்று காங்கிரஸ் கட்சிக்கு 41 சட்டமன்ற தொகுதிகள் ஒதுக்கப்பட்டது. திமுக தலைவர் கருணாநிதியை இன்று காங்கிரஸ் மேலிட பார்வையாளர் குலாம் நபி ஆசாத் மற்றும் தமிழக காங்கிரஸ் தலைவர் இளங்கோவன் ஆகியோர் சந்தித்து உடன்படிக்கை கையெழுத்திட்டனர்.

இதன் பின்னர் செய்தியாளர்களிடம் பேசிய தமிழக காங்கிரஸ் தலைவர் இளங்கோவன் கூறியதாவது, "தமிழக சட்டமன்ற தேர்தலில் காங்கிரஸ் கட்சி போட்டியிடவுள்ள 41 சட்டமன்ற தொகுதிகள் பட்டியல் திமுகவுடன் ஆலோசிக்கப்பட்டு வருகிறது.

காங்கிரஸ் போட்டியிடும் இடங்கள் குறித்து திமுக உடன் மீண்டும் ஏப்ரல் 6-ஆம் தேதி பேச்சுவார்த்தை நடத்தப்படும்.

காங்கிரஸ் வேட்பாளர் பட்டியல் ஏப்ரல் 15 அல்ல அதற்குள் வெளியிடப்படும்" என்று ஈ.வி.கே.எஸ்.இளங்கோவன் தெரிவித்தார்.