கட்டிடத்திற்கு காப்புரிமை பெற்ற தாஜ் ஹோட்டல்!

மும்பை: மும்பையில் உள்ள பிரபல சொகுசு ஹோட்டலான தாஜ் ஹோட்டல் நிறுவனம் தனது கட்டிடத்தின் தோற்றத்திற்கு காப்புரிமை பெற்றுள்ளது.

மகாராஷ்டிர மாநிலம் மும்பையில் உள்ள தாஜ் ஹோட்டல் உலக அளவில் மிகவும் புகழ்பெற்றது. 1903ஆம் ஆண்டு தொடங்கப்பட்ட இந்த ஹோட்டலின் பிரம்மாண்டமான வடிவமைப்பு பல திரைப்படங்களில் பின்னணிக் காட்சியாக இடம்பெற்றுள்ளது.

இந்த ஹோட்டல் நிர்வாகம் தங்கள் கட்டிடத்தின் தோற்றத்திற்கு காப்புரிமை பெற்றுள்ளது. இதன் மூலம் தாஜ் ஹோட்டலின் படத்தை லாப நோக்குடன் எங்கும் பயன்படுத்த முடியாது. அவ்வாறு பயன்படுத்த தாஜ் ஹோட்டலுக்கு பணம் கட்டி அனுமதி பெற வேண்டும்.

இதன் மூலம் கட்டிடத்திற்கு காப்புரிமை பெற்ற முதல் நிறுவனம் என்ற பெயரை தாஜ் ஹோட்டல் பெற்றுள்ளது. மும்பை நகரின் சின்னமாக விளங்குவதால் இந்தக் கட்டிடத்தின் முக்கியத்துவம் கருதி, காப்புரிமை பெற்றுள்ளதாக அந்நிறுவனம் கூறியுள்ளது.

கடந்த 2008ஆம் ஆண்டு நவம்பர் 26ஆம் தேதி இந்த ஹோட்டலில் பாகிஸ்தான் தீவிரவாதிகள் துப்பாக்கிச் சூடு நடத்தியது நினைவுகூரத்தக்கது.