இந்திய சுற்றுலாவை விரும்பும் வெளிநாட்டினர்: சுற்றுலாத்துறை தகவல்

கடந்த நவம்பர் மாதத்தில் இந்தியாவுக்கு வெளிநாட்டு சுற்றுலாப் பயணிகளின் வருகை 14.4 சதவீதம் அதிகரித்துள்ளதாக சுற்றுலாத்துறை அமைச்சகம் தெரிவித்துள்ளது.

இது குறித்து மத்திய சுற்றுலாத்துறை அமைச்சகம் வெளியிட்டுள்ள அறிக்கையில், கடந்த நவம்பரில் மட்டும் மொத்தம் 10.5 லட்சம் வெளிநாட்டு சுற்றுலாப் பயணிகள் இந்தியாவுக்கு வந்துள்ளனர். இது கடந்த ஆண்டு இதே காலகட்டத்தை ஒப்பிடுகையில் 14.4 சதவீதம் அதிகரித்துள்ளதாக கூறப்பட்டுள்ளது. இவர்களில் 2.14 லட்சம் பேர் ஈ-விசா மூலம் வந்துள்ளனர். இதுவும் கடந்த ஆண்டு இதே காலகட்டத்தில் உள்ள எண்ணிக்கையான 1.37 லட்சத்தைவிட 56.2% அதிகமானது.

கடந்த 2016ஆம் ஆண்டு நவம்பரில் இந்த எண்ணிக்கை 8.16 லட்சமாக இருந்தது என்றும் 2015ஆம் ஆண்டு நவம்பரில் சுற்றுலாப் பயணிகள் எண்ணிக்கை 878ஆக இருந்தது என்றும் இந்த அறிக்கை தெரிவிக்கிறது.



2017ஆம் ஆண்டு ஜனவரி முதல் நவம்பர் வரையான காலகட்டத்தில் மொத்தம் 90.1 லட்சம் சுற்றுலாப் பயணிகள் இந்தியாவுக்கு வருகை புரிந்துள்ளனர். இதுவும் கடந்த ஆண்டு இதே காலகட்டத்தை கருத்தில் கொண்டு பார்க்கும் போது, 15.6 சதவீதம் அதிகரித்துள்ளது. கடந்த ஆண்டு இதே நவம்பர் வரை 77.83 லட்சம் பேர் வெளிநாடுகளில் இருந்து இந்தியாவுக்கு சுற்றுலாவுக்கு வந்துள்ளனர். இதுவும் இதற்கு முந்தைய 2015ஆம் ஆண்டை விட 9.4 சதவீதம் அதிகம்.

இந்தியாவுக்கு வரும் வெளிநாட்டு சுற்றுலாப் பயணிகளில் அதிகபட்சமாக வங்கதேசத்தில் இருந்து 16.77 சதவீதம் பேர் வருகிறார்கள். அமெரிக்கா (14.77%), இங்கிலாந்து (10.23%), ரஷ்யா (4.41%), கனடா (4.39%), ஆஸ்திரேலியா (3.96%) மற்றும் மலேசியா (3.5%) ஆகிய நாடுகள் அடுத்தடுத்த இடங்களில் உள்ளன.



வெளிநாட்டு சுற்றுலாப் பயணிகள் அதிகம் வரும் விமான நிலையங்களின் பட்டியலில் முதலிடத்தில் டெல்லி விமான நிலையம் (29.76%) உள்ளது. மும்பை விமான நிலையம் (17.2%) இரண்டாவது இடத்திலும் வங்கதேச எல்லையில் உள்ள ஹரிதாஸ்பூர் விமான நிலையம் (8.4%) மூன்றாவது இடத்திலும் உள்ளன.