தேனியின் சிறப்பு வாய்ந்த கோவில்கள் ஒரு பார்வை !

தேனி மாவட்டத்தில் முல்லை, வைகை, வராக நதிகள் பாய்ந்து வளம் சேர்க்கின்றன. இதனால் இம்மாவட்டத்தின் பெரும் பகுதிகள் பச்சைப்பசேல் என்று இயற்கை அழகுடன் உள்ளது. தேனியில் நீங்கள் பார்க்க வேண்டிய கோவில்கள்

பாலசுப்பிரமணியர் கோயில்

இராஜேந்திர சோழனால் கட்டப்பட்ட முருகன் கோயில், தரையைப் பிளந்து கொண்டு, தன் தேவியரோடு முருகன் காட்சிதந்து கொண்டிருக்கும் கோயில்.

காமாட்சி அம்மன் கோயில்

இந்தக் கோயில் 200 ஆண்டுகள் பழமையானது. பெரிய குளத்திலிருந்து 23 கி.மீ. தொலைவில்,தேவதானப்பட்டி காமாட்சி அம்மன் கோயில் அமைந்துள்ளது. வைகாசி மாதம் நடக்கும் திருவிழா சிறப்பானது.

குச்சனனூர் சனீஸ்வரர் கோயில்

இந்தியாவிலேயே சனிபகவானுக்கான தனிக்கோயில் இது ஒன்றுதான். இங்குள்ள கருவறை மூர்த்தியே சனிபகவான்தான். இங்குள்ள சனிக் கடவுள் சுயம்புவாக எழுந்ததாகக் கூறப்படுகிறது. இக்கோயிலுக்கு முன்பாக, சுரபி நதி ஓடிக்கொண்டிருக்கிறது. ஆடி மாத சனிக்கிழமை இங்கு திருவிழா நடக்கும்.

மாவூத்து வேலப்பர் கோயில்

ஆண்டிப்பட்டியிலிருந்து 20 கி.மீ. தொலைவில் வருசநாட்டின் குன்றடுக்கில் அமைந்துள்ளது. குன்றின் உச்சியில் குமரன் கோயில் கொண்டுள்ளார். மாமரங்கள் அடர்ந்த பகுதி என்பதால் இதற்கு மாவூத்து என்று பெயர் வந்துள்ளது. இந்தக் குன்றத்துக் கோயில் காலை7.30-8.30 மணி வரையிலும், மாலை 4.30-5.30 மணி வரையிலும் நடை திறந்திருக்கும்