சிரிப்பதை நிறுத்துங்க.. பாலாஜியை வெளுத்து வாங்கிய கமல் ஹாசன்! பிக் பாஸ் இன்றைய 2வது ப்ரொமோ

இந்த வாரம் முழுவதும் பிக் பாஸ் வீட்டில் பல்வேறு சண்டைகள் நடந்தது. வழக்கமாக பிக் பாஸில் வாக்குவாதம், சண்டை சச்சரவு நடப்பது வாடிக்கையான ஒன்று தான் என்றாலும் பிக் பாஸ் 4ல் அது சற்று அதிகமாகவே நடந்துகொண்டிருக்கிறது.

பாலாஜி முருகதாஸ் செய்த சில விஷயங்கள் தான் தொடர்ந்து சர்ச்சைகளில் சிக்கி வருகிறது. அவர் பயன்படுத்திய சில வார்த்தைகளும் தற்போது கடும் விமர்சனங்களை பெற்று தந்து இருக்கிறது. சனம் ஷெட்டி அழகி போட்டியில் வெற்றி பெற்றது அட்ஜஸ்ட்மென்ட் மூலமாகத்தான் என்றும் அவர் கூறி இருந்தது சர்ச்சைக்கு உள்ளானது. தறுதலை என்ற வார்த்தையும் கூறியது பிரச்சனையை உருவாக்கியது. பெண்களை இழிவாக பேசும் அவரை ரெட் கார்டு கொடுத்து வெளியேற்ற வேண்டும் என பலரும் சமூக வலைத்தளங்களில் கேட்டு வருகிறார்கள்.

இந்நிலையில் இன்று சனிக்கிழமை பிக் பாஸ் வீட்டுக்கு வந்திருக்கும் கமல்ஹாசன் பாலாஜி முருகதாஸை வெளுத்து வாங்கி இருக்கிறார்.

'இப்போ என்ன மூடில் இருக்கீங்க? சண்டை மூடிலா அல்லது சமாதான மூடிலா' என கமல்ஹாசன் கேட்க ஹவுஸ்மேட்ஸ் அதற்கு பதில் அளித்து இருக்கிறார்கள். அதன் பின் பேசிய சனம் 'விட்டுடலாம் சார் வேண்டாம்' என தெரிவித்து இருக்கிறார்.

அதன் பின் பாலாஜி முருகதாஸ் பக்கம் திரும்பினார் கமல், அவர் சிரித்துக்கொண்டிருப்பதை பார்த்து கோபமான கமல் 'அந்த சிரிப்பை கொஞ்சம் off பண்ணிடுங்க' என தெரிவித்தார். அதன் பின் பாலாஜி சொன்ன வார்த்தை பற்றி கமல் பேசினார். அதற்கும் அவர் சரியாக பதில் அளிக்காததால் 'உங்களை சிரிப்பை தான் குறைத்துக்கொள்ள சொன்னேன். பேச்சை குறைச்சுக்க சொல்லலையே' என தெரிவித்தார்.

இதை எல்லாம் கேட்ட பாலாஜி முருகதாஸ் 'சாரி சார்' என்ற வார்த்தையை மட்டுமே பதிலாக கொடுத்திருப்பது தற்போது வெளியாகி இருக்கும் ப்ரொமோ வீடியோவில் காட்டப்பட்டு இருக்கிறது.