பாக்யஸ்ரீ
மகாராஷ்டிரா மாநிலம் புனேவை சேர்ந்தவர் பாக்யஸ்ரீ மோட்டே. தற்போது குடும்பத்துடன் மும்பையில் வசித்து வருகிறார். மராத்தி மொழி படங்களில் நடித்து வருகிறார் பாக்யஸ்ரீ. மராத்தி தவிர்த்து இந்தி, தெலுங்கு படத்திலும் நடித்திருக்கிறார். படங்களில் மட்டும் அல்லாமல் இந்தி, மராத்தி தொலைக்காட்சி தொடர்களிலும் நடித்துக் கொண்டிருக்கிறார் பாக்யஸ்ரீ மோட்டே.
மது
பாக்யஸ்ரீயின் அக்கா மது மார்க்கண்டேயா. புனேவில் இருக்கும் வாகட் பகுதியில் தன் தோழியுடன் சேர்ந்து கேக் கடை நடத்தி வந்தார். ஞாயிற்றுக்கிழமை தன் தோழியுடன் சேர்ந்து வாடகைக்கு வீடு பார்க்க சென்றிருக்கிறார் மது. வீட்டை பார்த்த பிறகு தனக்கு மயக்கம் வருவது போன்று இருக்கிறது என்று கூறியிருக்கிறார். உடனே அவரை அருகில் உள்ள தனியார் மருத்துவமனைக்கு அழைத்துச் சென்றார் தோழி.
மரணம்
தனியார் மருத்துவமனையில் சிகிச்சை அளிக்க முடியாது என்று, மேல் சிகிச்சைக்காக யஷ்வந்த்ராவ் சவான் நினைவு மருத்துவமனைக்கு தூக்கிச் சென்றிருக்கிறார்கள். அங்கு மதுவை பரிசோதனை செய்த மருத்துவர்கள் அவர் ஏற்கனவே இறந்துவிட்டதாக தெரிவித்தனர். மதுவின் மரணம் குறித்து போலீசார் வழக்குப்பதிவு செய்து விசாரணை நடத்தி வருகிறார்கள். மதுவின் முகத்தில் காயம் இருந்தது தெரிய வந்துள்ளது. மதுவின் மரணம் இயற்கை அல்ல அவர் கொலை செய்யப்பட்டிருக்கிறார் என குடும்பத்தார் தெரிவித்துள்ளனர். மதுவும், பாக்யஸ்ரீயும் மிகவும் நெருக்கமாக இருந்து வந்தார்கள். இந்நிலையில் அக்காவை இழந்து வாடும் பாக்யஸ்ரீக்கு பலரும் ஆறுதல் கூறி வருகிறார்கள்.
அக்கா
தன் அக்காவுடன் சேர்ந்து எடுத்துக் கொண்ட புகைப்படத்தை இன்ஸ்டாகிராமில் வெளியிட்டு பாக்யஸ்ரீ கூறியிருப்பதாவது, என் அக்கா இந்த உலகை விட்டு சென்றுவிட்டார். நீ எனக்கு எப்படிப்பட்டவர் என்பதை வார்த்தைகளால் விவரிக்க முடியாது. என் அம்மா, அக்கா, தோழி. நீ தான் என் அஸ்திவாரம். நீ இல்லாமல் என்ன செய்வது என்று தெரியவில்லை. அதை நீ சொல்லித்தரவும் இல்லை என தெரிவித்துள்ளார்.
ரசிகர்கள்
மதுவின் கணவர் கடந்த மாதம் தான் திடீர் என்று இறந்தார். அவர் இறந்த செய்தியை பாக்யஸ்ரீ சமூக வலைதளத்தில் தெரிவித்தார். இந்நிலையில் மதுவும் திடீரென இறந்துவிட்டார். கணவனும், மனைவியும் ஒரு மாத இடைவெளியில் இறந்தது பாக்யஸ்ரீயை சோகத்தில் ஆழ்த்தியுள்ளது. இதுவும் கடந்து போகும் என பாக்யஸ்ரீக்கு ரசிகர்கள் ஆறுதல் கூறி வருகிறார்கள்.