Bigg Boss Season 3: பிக்பாஸ் சீசன் 3-யில் களமிறங்குகிறார் ஜூலி..!

ஒரு வீட்டுக்குள் பிரபல போட்டியாளர்கள் சிலர் தங்கவைக்கப்பட்டு, வெளியுலகை தொடர்பு கொள்ளாமல், எந்தவிதமான தொழில்நுட்ப சாதனமும் பயன்படுத்தாமல் 100 நாட்கள் இருப்பது தான் பிக்பாஸ் ரியாலிட்டி ஷோவின் விதிமுறை.

வெளிநாடுகளில் ஹிட்டடித்த இந்நிகழ்ச்சி இந்தியாவில் இந்தியில் தயாரிக்கப்பட்டது. பிறகு கன்னடம், தெலுங்கு, தமிழ் மற்றும் மலையாளம் ஆகிய மொழிகளிலும் தயாரிக்கப்பட்டு பிரபலமடைந்துள்ளது.

தமிழ் பிக்பாஸ் நிகழ்ச்சியை கமல்ஹாசன் தொகுத்து வழங்கினார். முதல் இரண்டு சீசனும் தொலைக்காட்சி பார்வையாளர்கள் மத்தியில் மிகப்பெரிய வரவேற்பு பெற்றது. தவிர, அதுவே கமலின் அரசியல் பிரவேசத்திற்கு புதிய அச்சாரம் அமைத்தது.

முதல் சீசனில் ஆரவ், ஓவியா, சினேகன், வையாபுரி, காயத்ரி ரகுராம், ஜூலி உள்ளிட்ட 19 பேர் போட்டியாளர்களாக கலந்து கொண்டனர். இதில் நடிகை ஓவியாவும், ஜூலியும் ரசிகர்கள் மத்தியில் பெரிய கவனமீர்த்தனர். முடிவில் ஆரவ் முதல் சீசனின் வெற்றியாளராக அறிவிக்கப்பட்டார்.

அதேபோல பிக்பாஸ் சீசன் 2 நிகழ்ச்சியில் மும்தாஜ், தாடி பாலாஜி, நித்யா, ஜனனி, மகத், ரித்திகா போன்றோர் போட்டியாளர்களாக பங்கேற்றனர். முதல் சீசனை விட மிகவும் வரவேற்பு பெற்ற இதில் நடிகை ரித்திகா வெற்றியாளராக அறிவிக்கப்பட்டார்.

இந்நிலையில், விரைவில் பிக்பாஸ் சீசன் 3 நிகழ்ச்சி ஒளிப்பரப்பாகவுள்ளது. பெரும்பாலும் ஜூன் மத்திய வாரத்தில் இது விஜய் டிவியில் ஒளிப்பரப்பாகும் என்று சொல்லப்படுகிறது. அதற்கான படப்பிடிப்பும் தொடங்கி நடைபெற்று வருகிறது. இம்முறையும் கமல்ஹாசனே தொகுத்து வழங்கவுள்ளார்.

பல்வேறு போட்டியாளர்கள் குறித்து பரிசீலிக்கப்பட்டு வரும் நிலையில், முதல் சீசனில் பிக்பாஸில் புயலை கிளப்பிய ஜூலி மூன்றாவது சீசனில் போட்டியாளராக களமிறக்கப்படுவதாக அங்குள்ள வட்டாரங்கள் தகவல் கூறுகின்றன.

இதுதொடர்பாக எந்தவித அதிகாரப்பூர்வ அறிவிப்பும் இல்லை. எனினும், பிக்பாஸ் சீசனில் 3-ல் ஜூலி இடம்பெறுவதாக வெளியான செய்தி ரசிகர்கள் மத்தியில் வரவேற்பை பெற்றுள்ளது. எதுவாக இருந்தாலும் நிகழ்ச்சிக்கான ப்ரோமோ வீடியோ வெளியிட்ட பிறகே விவரங்கள் தெரியவரும். காத்திருக்கலாம்