காதலரை திருமணம் செய்த சின்ன தம்பி சீரியல் புகழ் ஸ்வேதா

கனா காணும் காலங்கள் தொலைக்காட்சி தொடர் மூலம் நடிகையானவர் ஸ்வேதா சுப்ரமணியன். அவர் கார்த்திகை பெண்கள், அழகி உள்ளிட்ட தொலைக்காட்சி தொடர்களில் நடித்துள்ளார். பிரஜின் நடித்து வரும் சின்ன தம்பி தொடரில் முக்கிய கதாபாத்திரத்தில் நடித்து வருகிறார் ஸ்வேதா.

ஸ்வேதா அருண் என்பவரை காதலித்து வந்தார். காதலை பெற்றோரிடம் சொல்லி திருமணத்திற்கு சம்மதம் பெற்றனர். இதையடுத்து கடந்த ஜூலை மாதம் 9ம் தேதி ஸ்வேதா, அருணின் நிச்சயதார்த்தம் நடந்தது.

ஜூலை 9ம் தேதி நிச்சயதார்த்தம் நடந்ததை ஸ்வேதா கடந்த மூன்று நாட்களுக்கு முன்பு தான் சமூக வலைதளம் மூலம் அறிவித்தார். அதை பார்த்த ரசிகர்களும், சின்னத்திரையுலகை சேர்ந்தவர்களும் ஸ்வேதாவுக்கு வாழ்த்து தெரிவித்தனர்.

இதையடுத்து கடந்த 5ம் தேதி ஸ்வேதா, அருணின் திருமணம் நல்லபடியாக நடந்து முடிந்தது. தன் கணவருடன் சேர்ந்து எடுத்த புகைப்படத்தை இன்ஸ்டாகிராமில் வெளியிட்டு தான் ஒரு வழியாக திருமதி ஆகிவிட்டதாக ஸ்வேதா சுப்ரமணியன் தெரிவித்துள்ளார்.

ஸ்வேதாவின் இன்ஸ்டாகிராம் போஸ்ட்டை பார்த்த பாண்டியன் ஸ்டோர்ஸ் முல்லை, பிக் பாஸ் புகழ் அபிராமி, நக்ஷத்ரா நாகேஷ் உள்ளிட்ட பல நடிகைகள் வாழ்த்து தெரிவித்துள்ளனர். ஸ்வேதாவின் திருமண வாழ்க்கை என்றும் சந்தோஷமாக இருக்க வேண்டும் என்று ரசிகர்கள் மனதார வாழ்த்தியுள்ளனர்.
நிச்சயதார்த்தம் தான் சத்தமில்லாமல் நடந்தது என்றால் திருமணமும் அப்படியேவா என்று சிலர் கேள்வி எழுப்பியுள்ளனர். அது சரி கொரோனா வைரஸ் காலம், கூட்டம் கூட்டுவது சரியில்லை. அதனால் இரு வீட்டார் முன்னிலையில் திருமணம் செய்து கொண்டிருக்கிறார்கள். இதில் குறை சொல்வதற்கும் ஒன்றும் இல்லை. தன் குடும்பத்தார், நண்பர்கள் என்று பெரிய கூட்டத்திற்கு முன்பு திருமணம் செய்து கொள்ள ஸ்வேதா ஆசைப்பட்டிருப்பார். அவர் ஆசையில் கொரோனா வைரஸ் மண்ணை அள்ளிப்போட்டுவிட்டது.

திருமணத்திற்கு யார், யார் வருகிறார்கள் என்பது முக்கியம் இல்லை. மனதுக்கு பிடித்த காதலனே கணவராகியிருப்பது தான் முக்கியம். அந்த வகையில் ஸ்வேதா கொடுத்துவைத்தவர் என்கிறார்கள் ரசிகர்கள்.

கொரோனா வைரஸ் பிரச்சனை காலத்தில் சின்னத்திரை பிரபலங்கள் தான் தொடர்ந்து நல்ல செய்தி தெரிவித்து தங்களுக்கு மகிழ்ச்சி அளிப்பதாக ரசிகர்கள் கூறியுள்ளனர். பாண்டியன் ஸ்டோர்ஸ் முல்லைக்கும், சென்னையை சேர்ந்த தொழில் அதிபர் ஹேமந்துக்கும் அண்மையில் திருமணம் நிச்சயிக்கப்பட்டது. நிச்சயதார்த்தத்தின் போது எடுக்கப்பட்ட புகைப்படங்கள் வெளியாகி வைரலாகின.

மைனா நந்தினிக்கு குழந்தை பிறந்தாச்சு: என்ன புள்ள தெரியுமா?

பாண்டியன் ஸ்டோர்ஸ் ஹேமாவுக்கு வளைகாப்பு நடந்தது. மைனா நந்தினிக்கு ஆண் குழந்தை பிறந்திருக்கிறது. ஆல்யா மானசா லாக்டவுனில் பெண் குழந்தையை பெற்றெடுத்தார்.