சனம் ஷெட்டி நடித்துள்ள 'குருதிக்களம்' வெப் சீரீஸ் ரிலீஸ் தேதி அறிவிப்பு!

விஜய் டிவியில் ஒளிபரப்பான, பிக்பாஸ் நிகழ்ச்சியின் 4ஆவது சீசனில் கலந்துகொண்டு பிரபலமானவர் சனம் ஷெட்டி. தற்போது இவர் நடித்துள்ள ‘குருதிக்களம்’ என்கிற வெப் தொடர் ஓடிடி தளத்தில் வெளியாக உள்ளது. இதில் நடிகர் சந்தோஷ் பிரதாப் ஹீரோவாக நடித்துள்ளார். அவருக்கு ஜோடியாக நடிகை சனம் ஷெட்டி நடித்துள்ளார.

இந்த வெப் தொடரை இயக்குனர்கள் ராஜபாண்டி மற்றும் தனுஷ் இணைந்து இயக்கி உள்ளனர். அசோக், செளந்தரராஜா ஆகியோர் முக்கிய கதாபாத்திரங்களில் நடித்துள்ளனர். கிரைம் திரில்லர் கதையம்சத்தில் இந்த வெப் தொடர் உருவாகி இருக்கிறது. இன்று ‘குருதிக்களம்’ வெப் தொடரின் டிரெய்லர் வெளியாகி உள்ளது.

சென்னையின் பின்புலத்தில் உள்ள குற்றவாளி கும்பல்களுக்கு இடையேயான கொடூரமான சண்டைக்களத்தை மையப்படுத்தி, உணர்வுப்பூர்வமான கதையாக இருக்கிறது. மேலும் அதீதமான சண்டை காட்சிகள் மற்றும் விறுவிறுப்பான கதையமைப்பை உள்ளடக்கியதாக இருக்கிறது.

"உன்னால் உன் விதியைத் தேர்ந்தெடுக்க முடியும், ஆனால் உன் எதிரிகளை உன்னால் தேர்ந்தெடுக்கமுடியாது“ இது இரண்டு இளைஞர்களின் கதை, வாழ்வின் தொடக்கத்தில் சரியான பாதையில் ஒன்றாக ஆரம்பித்த அவர்கள், இறுதியில் விதிக்கும், கடமைக்குமான இரத்தக்களரியான போரில், அவர்கள் கொடுக்கும் விலை என்ன என்பதே இதன் கதை களம்.


'குருதிக்களம்’ தொடரை தனுஷ், கே.மோகன், விக்னேஷ் கார்த்திக், கிஷோர் சங்கர் மற்றும் கவிராஜ் ஆகியோர் இணைந்து எழுதியுள்ளனர். 13 அத்தியாயங்களை கொண்டுள்ளது குருதிக்களம். இந்த தொடர் எம்எக்ஸ் பிளேயர்-ல் ஜனவரி 22ஆம் வெளியாகவுள்ளது.

மேலும் இத்தொடர் குறித்து இயக்குநர் ராஜபாண்டி கூறும்போது: “குற்றங்களை அடிப்படையாக கொண்ட கதைகள் தற்போதைய காலத்தில் ரசிகர்கள் அதிகம் விரும்புபவையாக இருக்கின்றன. இந்த இணைய தொடர் துரோகம், பழிவாங்கல் மற்றும் தியாகம் செய்தலுக்கு இடையிலான பெரும் உணர்வுகளைப் பொழுதுபோக்கு அம்சத்துடன் கலந்து சொல்லும் வகையில் ரசிகர்கள் விரும்பும்படி இருக்கும்” என்றார்.

'விசித்திரன்' படத்தலைப்பு விவகாரத்தில் இயக்குநர் பாலாவுக்கு நீதிமன்றம் நோட்டீஸ்!

மேலும் இயக்குனர் தனுஷ் கூறுகையில், "தொடர் பார்வையில் அனைத்து அத்தியாயங்களையும் பார்க்கும் ஆர்வத்தைத் தரும் வகையில் இந்தத் தொடர் உள்ளது. மிக அழகாக அத்தனை ஆக்சன் மற்றும் உணர்வுகளை அட்டகாசமாக 13 அத்தியாயங்களுக்குள் தந்திருக்கும் நடிகர் குழு மற்றும் தொழில்நுட்பக் குழுவிற்கு எனது மனமார்ந்த நன்றி.” என்றார்.