Bigg boss பிக்பாஸ் சீசன் 4 - எப்போது வருது, தொகுத்து வழங்குவது யார்?

ரியாலிட்டி ஷோக்களிலேயே மிகவும் வரவேற்பை பெற்ற பிரம்மாண்டமான நிகழ்ச்சி என்றால் அது பிக்பாஸ்தான். வழக்கமான பொதுமக்கள் மட்டுமின்றி பிரபலங்களும் பார்க்கும் நிகழ்ச்சியாக இருக்கிறது பிக்பாஸ். உலக நாடுகளிலெல்லாம் பெரும் வரவேற்பை பெற்ற இந்த நிகழ்ச்சி, இந்தியாவில் இந்தி, கன்னடம், மலையாளம், தெலுங்கு மற்றும் தமிழ் ஆகிய மொழிகளில் நடத்தப்பட்டு வருகிறது.

இந்தியில் சல்மான்கான் தொகுத்து வழங்கி பெரும் வரவேற்பை பெற்றது. இந்நிலையில் 14 வது சீசன் விரைவில் துவங்கவுள்ளதாக கூறப்படுகிறது. மேலும் தெலுங்கு மற்றும் தமிழிலும் விரைவில் இந்த நிகழ்ச்சி துவங்கப்படவுள்ளதாம்.

தெலுங்கில் ஜூனியர் என்டிஆர், நானி, நாகர்ஜூனா என முதல் மூன்று சீசன்களை தொகுத்து வழங்கிய நிலையில், நான்காவது சீசனை மகேஷ்பாபு தொகுத்து வழங்குவார் என கூறப்படுகிறது. அதற்கான பேச்சுவார்த்தைகள் இறுதிக் கட்டத்தை அடைந்துவிட்டதாகவும் தகவல் வெளியாகியுள்ளது. இந்நிலையில் மூன்று சீசன்களையும் தமிழில் தொகுத்து வழங்கிய கமல்ஹாசன் 4 வது சீசனுக்கு வருவாரா என ரசிகர்கள் எதிர்பார்த்து காத்திருக்கின்றனர்.

இந்த முறை கண்டிப்பாக கமல் இந்த நிகழ்ச்சியை தொகுத்து வழங்க வாய்ப்பில்லை என்றே கூறப்படுகிறது. அடுத்த ஆண்டு தமிழக சட்டமன்ற தேர்தல் வரவிருக்கிறது. மேலும் இந்தியன் 2 படம் இன்னும் நிறையவே ஷூட்டிங் செய்ய பாக்கி இருக்கிறது இந்த கட்டத்தில் அவர் இதையெல்லாம் விட்டுவிட்டு டிவிக்கு செல்வாரா என ரசிகர்கள் கேட்கின்றனர்.

தமிழில் பிக்பாஸ் நிகழ்ச்சி சீசன் 4, செப்டம்பர் மாதம் துவங்கும் என கூறப்படுகிறது. முந்தைய மூன்று சீசன்களும் ஜூன் மாதத்திலேயே துவங்கப்பட்டது. இந்நிலையில், செப்டம்பருக்கு தள்ளி வைக்கப்பட்டிருப்பதற்கான காரணம் தெரியவில்லை.