#26YearsOfSunTV: 26 வருட கொண்டாட்டம்: 95 நாளிலேயே சன் டிவியில் மாஸ் காட்டும் பேட்ட!

ரஜினிகாந்த், விஜய் சேதுபதி, த்ரிஷா ஆகியோரது நடிப்பில் வெளியான பேட்ட படம் வரும் 14ம் தேதி தமிழ் புத்தாண்டை முன்னிட்டு சன் டிவியில் ஒளிபரப்பாகிறது.

இயக்குனர் கார்த்திக் சுப்புராஜ் இயக்கத்தில் ரஜினிகாந்த், நவாசுதின் சித்திக், பாபி சிம்ஹா, விஜய் சேதுபதி, த்ரிஷா, சசிகுமார் ஆகியோர் பலர் நடிப்பில் உருவான படம் பேட்ட. சன் பிக்சர்ஸ் நிறுவனம் தயாரிப்பில் உருவான இப்படம் கடந்த பொங்கல் பண்டிகையை முன்னிட்டு ஜனவரி 10ம் தேதி திரைக்கு வந்தது. வசூல் ரீதியாகவும், விமர்சன ரீதியாகவும் இப்படம் ரசிகர்களிடையே நல்ல வரவேற்பு பெற்றது.

இந்த நிலையில், பேட்ட படத்தின் வெளியீட்டு உரிமையை கொண்டிருக்கும் சன் நிறுவனம், வரும் 14ம் தேதி தமிழ் புத்தாண்டு தினத்தை முன்னிட்டு சன் டிவியில் மாலை 6 மணிக்கு ஒளிபரப்பாகிறது. அதுவும், சன் டிவி நிறுவனம் தொடங்கப்பட்டு 26 ஆண்டுகள் (1993, ஏப்ரல் 14) ஆன நிலையில், அதனை சிறப்பிக்கும் வகையில், தமிழ் புத்தாண்டு தினத்தன்று பேட்ட படம் ஒளிபரப்பாகிறது என்பது குறிப்பிடத்தக்கது.

வெளியாகி 95 நாட்களிலேயே பெரிய மாஸ் ஹீரோவின் படம் சின்னத்திரையில் ஒளிபரப்பப்படுவது இதுவே முதல் முறையாக பார்க்கப்படுகிறது. பொதுவாக வெள்ளித்திரையில், ஒரு படம் ஹிட் கொடுக்கவில்லை என்றால், அந்தப் படம் சின்னத்திரைக்கு வருவது வழக்கம். ஆனால், இப்படியொரு மாஸ் ஹீரோவின் படம் சின்னத்திரைக்கு வருவது பலரையும் அதிர்ச்சிக்குள்ளாக்கியுள்ளது.

சன் பிக்சர்ஸ் நிறுவனத்தின் படம் என்பதால், பேட்ட உடனே டிவியில் ஒளிபரப்பப்படுகிறது.இதையே ஒரு உதாரணமாகக் கொண்டு கூட மற்ற மாஸ் ஹீரோக்களின் படங்களும் சின்னத்திரைக்கு வந்துவிடும் என்று எதிர்பார்க்கப்படுகிறது.

இதே போன்று விஜய் சேதுபதி நடிப்பில் வந்த சீதக்காதி படம் வரும் 13ம் தேதி காலை 10.30 மணிக்கு விஜய் டிவியில் ஒளிப்பாகிறது என்பது குறிப்பிடத்தக்கது.