மாற்றுத்திறனாளிகள் நடக்க உடலில் பொருத்திக் கொள்ளும் வகையில் புதிய ரோபோ

ஷாங்காய்: மாற்றுத் திறனாளிகள் நடப்பதற்காக, அவர்கள் உடலில் பொருத்திக் கொண்டு செல்லும் வகையில் புதிய ரோபோ அறிமுகம் செய்யப்பட்டுள்ளது.

சீனாவைச் சேர்ந்த ’ஃபோரியர் இண்டெலிஜென்ஸ்’ என்ற தொழில்நுட்ப நிறுவனம், புதிய வகை ரோபோ ஒன்றை வெளியிட்டுள்ளது. இதுகுறித்து விளக்கம் அளித்து பேசிய அந்நிறுவனத்தின் தலைமை செயல் அதிகாரி கு ஜி, ’ஃபோரியர் எக்ஸ் ஒன்’ என்ற ரோபோட் 20 கிலோ எடை கொண்டதாகவும், எக்சோ ஸ்கெலிடன் முறையில் வடிவமைத்துள்ளதாக தெரிவித்தார். முதுகு தண்டுவடத்தில் காயம் அல்லது பக்கவாதம் ஏற்பட்டவர்களுக்கு உதவும் வகையில் உருவாக்கப்பட்டுள்ளதாக கூறினார். ஜப்பானின் சைபர்டைனி, இஸ்ரேலின் ரீவாக் ஆகிய ரோபோக்களை விட குறைந்த விலையில் விற்பனைக்கு கொண்டு வரவுள்ளதாக கு ஜி குறிப்பிட்டார். அதன் விலை 87,000 முதல் 1,45,000 அமெரிக்க டாலர்கள் வரை நிர்ணயம் செய்யப்படவுள்ளதாக தெரிவித்தார்.

தற்போது ’ஃபோரியர் எக்ஸ் ஒன்’ ரோபோவின் உட்காருதல், நிற்றல், நடத்தல், படி ஏறுதல் ஆகிய செயல்பாடுகளை மேம்படுத்தும் நடவடிக்கையில் ஈடுபட்டுள்ளதாக கூறினார். இடுப்பில் 2, முட்டியில் 2 என மொத்த 4 மோட்டார்களும், 7 மணி நேரம் இயங்கக் கூடிய வகையில் 4 பேட்டரிகளும் பொருத்தப்பட்டுள்ளன. சீனாவில் உள்ள 80 மில்லியன் மக்கள் மாற்றுத்திறனாளிகளில் பெரும்பாலானோர் நடக்க முடியாதவர்கள் என்பது குறிப்பிடத்தக்கது. இன்னும் ஒன்று அல்லது இரண்டு ஆண்டுகளில் ரோபோ விற்பனைக்கு வரும் என்று தெரிவிக்கப்பட்டுள்ளது.

A China-made wearable robot, which can help people with disabilities walk, is expected to enter the market in one to two years, the developer has said.