நிலம், நீரில் செல்லும் விமானம் சீனாவில் வெற்றிகர சோதனை- வீடியோ இணைப்பு

பீய்ஜிங்: நிலம் மற்றும் நீரில் செல்லக் கூடிய வகையில் வடிவமைக்கப்பட்டுள்ள உலகின் மிகப்பெரிய விமானத்தின் முதல்கட்ட சோதனையை சீன அரசு வெற்றிகரமாக மேற்கொண்டுள்ளது.

சீன விமானப் போக்குவரத்துத் துறை சார்பில், நிலம் மற்றும் நீரில் செல்லக் கூடிய வகையிலான விமானம் அந்நாட்டிலேயே வடிவமைக்கப்பட்டு உருவாக்கப்பட்டுள்ளது. ஏஜி-600 என பெயரிடப்பட்டுள்ள இந்த விமானம், நீர் மற்றும் நிலத்தில் செல்லக்கூடிய விமானங்களில் உலகிலேயே மிகப்பெரியது என்ற பெருமையை பெற்றுள்ளதாகவும் கூறப்படுகிறது.

நடுக்கடலில் ஏதேனும் அசம்பாவிதம் ஏற்படும் சமயத்தில் விரைந்து சென்று மீட்புப் பணிகளை மேற்கொள்ளும் வகையிலும், நிலப் பரப்பில் செல்லலும் வகையிலும், காட்டுத் தீ ஏற்படும் சமயத்தில் விரைந்து சென்று அணைப்பதற்கும் உதவும் வகையில் இந்த விமானம் வடிவமைக்கப்படுள்ளது.

வானில் பறந்துகொண்டிருக்கும் போதே நிலத்திலும், நீரின் மேற்பரப்பிலும் இறங்கும் வகையில் வடிவமைக்கப்பட்டுள்ள இந்த விமானம், சுமார் 37 மீட்டர் மொத்த நீளமும், 38.8 மீட்டர் இறக்கை நீளமும் கொண்டது. மேலும், ஒரு முறை எரிபொருள் நிரப்பினால், இடைவிடாமல் 4500 கி.மீ தூரம் வரை பறக்கும் இந்த விமானம், ஒரே நேரத்தில் 53.5 டன் எடையை சுமந்து செல்வதோடு, 20 நொடியில் 12 டன் நீரை உறிஞ்சம் வகையில் அமைக்கப்பட்டுள்ளது.


இந்நிலையில், ஏஜி-600 ரக விமானத்தின் முதல்கட்ட சோதனையை சீன அரசு வெற்றிகரமாக மேற்கொண்டுள்ளது. நிலத்தில் செல்லும் சோதனை வெற்றிகரமாக நடைபெற்றுள்ள நிலையில், இந்த ஆண்டின் அடுத்த பாதியில் நீரில் செல்லும் சோதனை மேற்கொள்ளப்படும் என தெரிகிறது.

மேலும், விமானத்தின் மற்ற சோதனைகள் அடுத்தடுத்த நாட்களில் நடைபெறும் என தெரிவிக்கப்பட்டுள்ள நிலையில், விமானம் செயல்பாட்டுக்கு வரும் முன்னர், கடல் பகுதியில் மீட்புப் பணிகள் குறித்த சோதனை, காட்டுத் தீயை கட்டுக்குள் கொண்டுவருவதற்கான சோதனைகள் மேற்கொள்ளப்படும் எனவும் தெரிவிக்கப்பட்டுள்ளது. சோதனை முயற்சிகள் அனைத்தும் வெற்றிகரமாக முடிந்த பின்னர், சீன ராணுவத்திற்கு இந்த விமானம் அர்பணிக்கப்படவுள்ளது.
World’s largest amphibious aircraft passes ground tests in China